Patay ang isang 46-anyos na tricycle driver habang sugatan ang pasahero nito makaraang madaganan ng natumbang puno ng Narra habang bumibiyahe at napadaan sa Brgy San Francisco, Gen Trias City, Cavite
Ayon sa report, naisugod pa sa Gen Trias City Medicare Hospital ang biktimang si Abelardo Garcia Adriano, 46 ng B25 L10, Sunny Brooke Subdivision, Brgy San Francisco ng nasabing lungsod.
Sugatan naman ang pasahero nito na si Bonn Carlo Rubia, 20 ng Ph4 B9 L3, Tierra Nevada Subdivision, Brgy San Francisco dahil sa tinamong sugat sa katawan.
Batay sa ginawang imbestigasyon ng pulisya dakong alas-5:00 ng hapon nang naganap ang insidente sa kahabaan ng Tierra Nevada Road, ng naturang lugar habang minamaneho ng biktima ang kanyang tricycle at sakay ang pasahero nito si Rubia nang bumagsak ang isang Narra tree sa mismong tricycle nito.
Napag alaman na malubhang nagtamo ng mga sugat ang driver na hindi n umabot pa ng buhay sa pagamutan, habang halos galos lang ang tinamo ng pasahero nito. May teorya na maaring lumabot ang lupang kinalalagyan ng puno sanhi ng ulan dulot ng bagyo kung kaya nabuwal ito.MARGIE BAUTISTA
