Tagumpay ang Cluster 5 at Cluster 9 na makuha ang kampeonato sa First Cong. AJ Cup Inter-cluster Volleyball Tournament nitong Sabado, Hulyo 22, 2023, na ginanap sa Imus Sports Complex.

Hindi nagpapigil ang Cluster 9 na makamit ang kampeonato sa Women’s Division ng paligsahan sa tatlong magkakasunod na panalo kontra Cluster 6 sa puntos na 25-23, 25-22, at 25-17.

Siniguro naman ng Cluster 5 na wala silang talo sa buong takbo ng Men’s Division bago hiranging kampeon sa kanilang huling laban kontra Cluster 4. Nagtapos ang laban sa puntos na 25-18, 25-22, 24-25, at 25-20.

Nasungkit naman ng Cluster 1 Women’s Team at ng Cluster 3 Men’s Team ang ikatlong puwesto.

Nag-uwi ang mga kampeon ng tropeo at tig-P300,000. Ginawaran din ng tig-P70,000 at tig-P50,000 ang ikalawa at ikatlong koponan sa parehong dibisyon. Nakatanggap naman ang 12 koponan ng tig-P10,000.

Handog ito nina Congressman Adrian Jay “AJ” C. Advincula at City Mayor Alex “AA” L. Advincula sa mga kabataang Imuseñong pinatunayan ang kanilang galing at kakayahang tumanggap ng pagkatalo sa pamamagitan ng larong volleyball.

Pinasalamatan din ng kongresista at ng alkalde ang mga taong nasa likod ng tagumpay ng kauna-unahang Cong. AJ Cup Inter-cluster Volleyball Tournament. Bahagi nito ang pangunguna ng City Sports Development Unit at pakikipagtulungan ng City Information Office, mga coach, utility at umpire.